Tibetan Content

Requires Microsoft's Himalaya font to view properly.

སྤྱི་ལོ་ཉིས་སྟོང་དགུ་ལོར་༧སྐྱབས་མགོན་༧གོང་མ་༧བདག་ཆེན་རིན་པོ་ཆེ་མཆོག་ཤར་ཕྱོགས་སུ་ཕེབས་པའི་མཛད་རིམ་རགས་བསྡུས།

 

སྤྱི་ལོ་༢༠༠༩ལོའི་སྤྱི་ཟླ་༡༠ཚེས་༢༠ཉིན་བདག་ཆེན་རིན་པོ་ཆེས་ཐེ་པེ་རུ་མཛད་རིམ་སྐྱོང་བཞིན་པ།

 

 

ཚེས་༢༡ཉིན་བདག་ཆེན་རིན་པོ་ཆེས་ཐེ་ཀྲུང་དུ་ཡོད་པའི་ཀ་ཐོག་རིག་འཛིན་ཆེན་མོའི་ཆོས་ཚོགས་སུ་མགོན་དཀར་གྱི་རྗེས་གནང་བཀའ་དྲིན་སྐྱོང་བཞིན་པ།

 

ཚེས་༢༣ཉིན་བདག་ཆེན་རིན་པོ་ཆེས་མཆོག་གིས་ས་གཞི་བྱིན་གྱིས་རློབ་གནང་བཞིན་པ།

 

ཚེས་༢༥ཉིན་བདག་ཆེན་རིན་པོ་ཆེ་མཆོག་གིས་ཀོན་ཡུན་ལྷ་ཁང་དུ་སྤྱན་རས་གཟིགས་ཀྱི་སྒོམ་ཁྲིད་དང་ཀུ་རུ་ཀི་ལིའི་རྗེས་གནང་བསྐུར་གནང་མཛད་པ།

 

ཚེས་༢༨ཉིན་ཚོགས་འཁོར་དང་འབྲེལ་དང་མཁའ་འགྲོའི་གར་འཆམ་གྱི་ཚོགས་དབུར་བཞུགས་པ།

 

ཚེས་༢༩ཉིན་ཚོགས་མཆོད་དང་སྦྱིན་སྲེག་གི་ཚོགས་དབུར་བཞུགས་པ།

 

ཚེས་༣༠ཉིན་ཀརྨ་ཆགས་མེད་རིན་པོ་ཆེས་བདག་ཆེན་རིན་པོ་ཆེ་མཆོག་གི་སྐུའི་འཁྲུངས་སྐར་དང་འབྲེལ་བའི་བརྟན་བཞུགས་འབུལ་བཞིན་པ།

 

སྤྱི་ཟླ་༡༡ཚེས་༢ཉིན་བདག་ཆེན་རིན་པོ་ཆེ་མཆོག་ཁམས་སྤྲུལ་རིན་པོ་ཆེའི་སྐུ་འཁོར་དང་ལྷན་དུ་བཞུགས་པ།

 

སྤྱི་ཟླ་༡༡ཚེས་༩་ཉིན་རིན་པོ་ཆེ་མཆོག་གིས་བོད་ཀྱི་རིག་གཞུང་ཞིབ་འཇུག་ཁང་དུ་བཀའ་སློབ་སྩོལ་གནང་བཞིན་པ།

 

སྤྱི་ཟླ་༡༡ཚེས་༡༣ཉིན་བདག་ཆེན་རིན་པོ་ཆེ་མཆོག་གི་ཧོང་ཁོང་དུ་བོད་མདོ་ཁམས་སྒ་ཡུལ་ནས་བསླེབས་པའི་ན་གཞོན་ཞབས་བྲོ་མཁན་དག་ལ་མཇལ་ཁ་གནང་བཞིན་པ།

 

སྤྱི་ཟླ་༡༡ཚེས་༡༥ཉིན་བདག་ཆེན་རིན་པོ་ཆེ་མཆོག་ཧོང་ཁོང་དུ་ཡོད་པའི་རྒྱ་བླ་མ་ཀན་ཙུའི་ཆོས་ཚོགས་མཧྰ་ཡོ་ག་སི་དྷ་ཞེས་པར་འཁོན་གདུང་ཨ་བྷི་ཥེ་ཏ་དང་རྒྱ་བླ་མའི་ཡང་སྲིད་ལྷན་དུ་བཞུགས་གནང་བ།

 

ཆོས་ཚོགས་མཧྰ་ཡོ་ག་སི་དྷ་ཆོས་ཚོགས་སུ་མི་མང་ལ་མཇལ་ཁ་གནང་བཞིན་པ།

 

སྤྱི་ཟླ་༡༡ཚེས་༡༦ཉིན་བདག་ཆེན་རིན་པོ་ཆེ་སྟོན་འཁོར་སྦྱིན་བདག་ཡེན་སྟེང་ཞལ་དང་ལྷན་དུ་ཉིན་གུང་གསོལ་ཚིགས་སུ་ཕེབས་པ།

 

གནས་མཆོག་ལུམྦྷི་ནིར་བདག་ཆེན་རིན་པོ་ཆེ་མཆོག་གདུང་སྲས་ཨ་བྷ་ཡ་དང་ལྷན་དུ་བཞུགས་པ།

 

ཕུན་ཕོའི་གདུང་སྲས་ཨ་བྷི་ཥེ་ཏ་མཆོག་གིས་བདག་ཆེན་རིན་པོ་ཆེར་བརྟན་བཞུགས་འབུལ་བཞིན་པ།

 

སྒྲོལ་ཕོའི་གདུང་སྲས་སྐུ་གཞོན་གྱིས་བདག་ཆེན་རིན་པོ་ཆེ་མཆོག་ལ་བརྟན་བཞུགས་འབུལ་བཞུགས་བཞིན་པ།

 

ཕུན་ཕོའི་གདུང་སྲས་ཨ་སང་གྷ་མཆོག་གིས་བདག་ཆེན་རིན་པོ་ཆེ་མཆོག་ལ་བརྟན་བཞུགས་འབུལ་བཞུགས་བཞིན་པ།

 

ཕུན་ཕོའི་གདུང་སྲས་ཨ་བྷ་ཡ་མཆོག་གིས་བདག་ཆེན་རིན་པོ་ཆེ་མཆོག་ལ་བརྟན་བཞུགས་འབུལ་བཞུགས་བཞིན་པ།

 

ས་སྐྱ་གོང་མ་རྣམ་གཉིས་དང་གདུང་སྲས་རྣམ་པ་དང་བདག་མོ་རྣམ་པ་དེ་བཞིན་ཞབས་དྲུང་རྣམ་པ་ལྷན་བཞུགས།

 

སྡེ་གཞུང་སྤྲུལ་སྐུས་བདག་ཆེན་རིན་པོ་ཆེ་མཆོག་ལ་བརྟན་བཞུགས་འབུལ་བཞུགས་བཞིན་པ།

 

 

བདག་ཆེན་རིན་པོ་ཆེ་མཆོག་གིས་ས་སྐྱའི་ཞབས་དྲུང་རྣམ་པར་བཀའ་བསྒོ་གནང་བཞིན་པ།  

Last Updated: Monday, 31 August 2015 16:46

འཁོན་གདུང་༧ཨ་བྷི་ཥེ་ཏ་རིན་པོ་ཆེ་མཆོག་གིས་རྡོ་རྗེ་ཕུར་པའི་སྐུ་མཚམས་དང་ རྡོ་རྗེ་སློབ་དཔོན་གནང་བའི་མཛད་རིམ།

 

འཁོན་གདུང་༧ཨ་བྷེ་ཥེ་ཏ་རིན་པོ་ཆེ་མཆོག་གི་སེ་ཨ་རོལ་ས་གནས་ཀྱི་སྤྲོ་སྐྱིད་ལྡན་པའི་གུང་གསེང་དེ་སྤྱི་ཟླ་ལྔ་པའི་ཟླ་མཇུག་ཏུ་རྫོགས་མ་ཐག སྐུ་ཉིད་ལམ་སེང་རྒྱ་གར་རྡོ་རྗེ་གླིང་ས་གནས་སུ་ཡོད་པའི་ས་སྐྱ་གུམ་དགོན་པར་ཕེབས་ཏེ་དཔལ་ཆེན་རྡོ་རྗེ་ཕུར་པའི་སྐུ་མཚམས་དབུ་འཛུག་གནང་། ཁོང་གིས་ལོ་སྔོན་མའི་ནང་དུ་ཕུར་པའི་ཆོ་ག་ཕྱག་ལེན་མཐའ་དག་གི་རྒྱུགས་འབུལ་ལེགས་གྲུབ་གནང་བ་དང་། དཔལ་ས་སྐྱའི་ཁྲི་འཛིན་རིན་པོ་ཆེ་མཆོག་གི་སྐུ་མདུན་ནས་དཔལ་ཆེན་རྡོ་རྗེ་ཕུར་པའི་བཀའ་དབང་ཟབ་མོ་ཡང་སྐྱར་གསན་བཞེས་མཛད། དེ་བཞིན་ཕུར་དྲག་གི་བཀའ་དབང་ཡང་སྐྱབས་མགོན་ཁྲི་འཛིན་རིན་པོ་ཆེ་གང་ཉིད་ཀྱི་ཞལ་སྔ་ལས་༢༠༠༩ལོའི་སྤྱི་ཟླ་གཉིས་པའི་ནང་ཞུས་གནང་མཛད།

འཁོན་གདུང་ཉིད་ཀྱིས་ཕུར་པའི་སྐུ་མཚམས་འདི་བཞིན་བོད་ཟླ་བཞི་པའི་ཚེས་བཅུ་དྲུག་དང་སྤྱི་ཟླ་དྲུག་པའི་ཚེས་བརྒྱད་ཉིན་དབུ་འཛུག་གནང་ཞིང་། གུམ་དགོན་པའི་མཁན་པོ་དཔལ་ལྡན་ཕུན་ཚོགས་ལགས་ཀྱིས་རྒན་ཀུན་བཟང་རྒྱ་མཚོ་ལགས་དང་ལྷན་དུ་བསྙེན་སྒྲུབ་ལས་གསུམ་གྱི་ཕྱག་རོགས་གང་ལེགས་གནང་། འཁོན་གདུང་གང་ཉིད་ཀྱིས་བསྙེན་སྒྲུབ་འདི་ཉིད་བླ་མ་བརྒྱུད་པའི་ཕྱག་བཞེས་བཞིན་ཚད་དང་ལྡན་པ་ཞིག་གནང་བ་སྟེ། སྤྱི་ཟླ་བརྒྱད་པའི་ཚེས་ཉེར་གཅིག་ཉིན་བར་དུ་སྒོ་གསུམ་ལྷ་སྔགས་ཡེ་ཤེས་ཀྱི་རོལ་བའི་ངང་དུ་དཔལ་ཆེན་རྡོ་རྗེ་གཞོན་ནུའི་རྩ་སྔགས་འབུམ་བཅུ་བདུན་ལྷག་གྲངས་གསོག་གནད་སྨིན་མཛད།

གུམ་ནི་བཞའ་ཚན་དང་བརླན་གཤེར་ཆེ་བའི་རི་གྲོང་ཞིག་ཁྱད་མཚར་ཞིག་ཡིན་ཞིང་། ཆར་དུས་ཧྲིལ་བོར་སྨུག་པས་གཡོགས་པ་དང་ཆར་བ་ཆེན་པོ་རྟག་པར་འབབ། ཡིན་ན་ཡང་། ཉིན་འདི་ཚོའི་རིང་ལ་ཉི་འོད་འཕྲོས་ཤིང་། ནམ་མཁའ་དྭངས་པ་དང་རི་བོ་དག་གིས་མཛེས་ཤིང་ལྟ་ན་སྡུག་པའི་ཡུལ་ལྗོངས་ཀྱི་བཀོད་པ་ཡོངས་སུ་རྫོགས་པ་ངོམས་པར་བྱེད།

ད་ལྟའི་དུས་ཚོད་འདིར་འཁོན་གདུང་ཉིད་ཀྱིས་གུམ་གྲྭ་བདུན་དང་ལྷན་དུ་ལྷ་ཁང་ལྟེ་བའི་ནང་དུ་བསྙེན་སྒྲུབ་ཀྱི་ཉེར་མཁོའི་ཡན་ལག་ཏུ་གྱུར་པའི་སྦྱིན་སྲེག་གི་ཆོ་ག་ཕྱག་བཞེས་གནང་བཞིན་ཡོད་པ་དང་། སྤྱི་ཟླ་བརྒྱད་པའི་ཚེས་ཉེར་བརྒྱད་ཉིན་དཔལ་མགོན་ཞལ་བཞི་པའི་བསྐང་གསོའི་ཆོ་གའི་དུས་སུ། ཡིད་དབང་འཕྲོག་པར་བྱེད་པའི་འཇའ་ཚོན་ཞིག་དགོན་པའི་ཐད་ཀ་ནས་ཤར་བས་ཉིན་མོ་འདི་ཧ་ཅང་ངོ་མཚར་བ་ཞིག་ཏུ་སྒྱུར་བར་བྱེད།

དེ་རྗེས་འཁོན་གདུང་མཆོག་གིས་ཉིན་བཞིའི་རིང་གི་སྟ་གོན་གྱི་སྒོ་ནས་སྤྱི་ཟླ་དགུ་བའི་ཚེས་གཉིས་ནས་དབུ་འཛུག་རྒྱུའི་ཕུར་སྒྲུབ་ཀྱི་རྡོ་རྗེ་སློབ་དཔོན་གནང་རྒྱུའི་མཛད་རིམ་གནང་།

སྤྱི་ཟླ་དགུ་བའི་ཚེས་བཞི་བོད་ལུགས་ཚེས་བཅོ་ལྔའི་ཟླ་བ་ཉ་ཡོངས་སུ་གང་བའི་ཉིན་མོར། རྒྱ་བླ་མ་ཀན་ཙོའུའི་ཡང་སྲིད་ནས་ཁོང་གི་རྡོ་རྗེ་ཕུར་བའི་ཆོ་ག་ཕྱག་བཞེས་རྒྱུགས་སྤྲོད་ལེགས་འགྲུབ་བྱུང་བ་དང་།  ཉིན་འདིར་ཉེ་འཁོར་ས་ཁུལ་རྡོ་རྗེ་གླིང་དང་བཀའ་བློན་སྦུངས། འབྲས་ལྗོངས་སོགས་སུ་གནས་སྡོད་ས་སྐྱའི་མི་མང་ཚོས་འཁོན་གདུང་ཨ་བྷེ་ཥེ་ཏ་རིན་པོ་ཆེ་མཆོག་གི་ངོ་མཚར་རྨད་དུ་བྱུང་བའི་ཆོས་ཀྱི་མཛད་སྒོར་མཇལ་བའི་ཉིན་མོ་ཁྱད་པར་ཅན་ཞིག་ཡིན་པ་དང་། ནམ་མཁའ་གཡའ་དག་ཅིང་ཉི་འོད་དྲོ་བའི་ཉིན་མོ་གཉིས་པ་ཞིག་དང་། དགུང་མོའི་དུས་སུ་སྔོ་བསང་ནམ་མཁའི་ངོས་སུ་ཉ་གང་ཟླ་བའི་བཞིན་རས་མཛེས་སྡུག་འབར་བའི་མཚན་མོ་ཞིག་ཀྱང་རེད། སྐུ་མགྲོན་གྱི་གཙོ་བོར་དཔལ་ས་སྐྱ་ཕུན་ཚོགས་ཕོ་བྲང་གི་བདག་མོ་སྐུ་ཞབས་མཆོག་དང་། བདག་མོ་ཕེ་སྒེ། བདག་མོ་ལྷ་མཛེས། ས་སྐྱའི་ཆོས་ཚོགས་པ་ཨ་ཞེ་ལེ། ཧོང་ཁོང་མ་ཧྰ་སི་དྷ་ཆོས་ཚོགས་ཀྱི་ཚོགས་མི། ཧྥ་རན་སིའི་ས་སྐྱ་བརྩེ་ཆེན་གླིང་གི་བླ་མ་གྲགས་པ་དང་ཁོང་གི་སློབ་མ་རྣམས། དེ་བཞིན་འཛམ་གླིང་གི་ས་ཕྱོགས་གང་ས་ནས་ཕེབས་པའི་སྐུ་མགྲོན་རྣམས་མཉམ་བཞུགས་གནང་བ་རེད།

སྤྱི་ཟླ་དགུ་བའི་ཚེས་བཞི་སྟེ་རྡོ་རྗེ་ཕུར་བའི་སྒྲུབ་མཆོད་ཀྱི་ཉིན་མཐའ་མ་དེ་ཡང་ཕུན་སུམ་ཚོགས་པ་དང་ལྡན་པ་ཞིག་བྱུང་བ་སྟེ། དེར་ཡོད་མི་མང་ལ་མཚོིན་ན་འཁོན་གདུང་ཨ་བྷི་ཥེ་ཏ་རིན་པོ་ཆེ་མཆོག་གིས་གཙོ་སྐྱོང་མཛད་པའི་སྒྲུབ་མཆོད་འདི་དེ་འདྲའི་ཡིད་བརྟེན་འཕེར་བ་ཞིག་དང་གོ་རིམ་ལྡན་པ་ཞིག་བྱུང་བ་ནི་སྐུ་ན་གཞོན་པ་ལ་དཔགས་ན་བློ་སྟོབས་འཕེལ་དགོས་པ་ཞིག་རེད་ལ། དེ་བཞིན་སེམས་ཚོར་དང་དབྱིངས་འཕར་བར་བྱེད་པ་ཞིག་ཀྱང་རེད། སྐབས་འདིར་འཁོན་གདུང་ཨ་བྷ་ཡ་རིན་པོ་ཆེ་མཆོག་ཀྱང་སྒྲུབ་མཆོད་འདིའི་དུས་ཚོད་ཚང་མའི་ནང་དུ་སྐུ་གཅེན་དང་མཉམ་བཞུགས་མཛད་ཅིང་། ཕུན་ཚོགས་ཕོ་བྲང་ལ་མཚོན་ན་ལོ་ངོ་ལྔ་བཅུའི་རིང་འཁོན་གདུང་སྔགས་འཆང་ཞིག་དང་རབ་བྱུང་ཞིག་རྣམ་གཉིས་ཀྱིས་འདི་ལྟ་བུའི་དགའ་མགུ་ཡི་རངས་ཀྱི་གནས་སུ་གྱུར་པའི་སྒྲུབ་མཆོད་ཅིག་གཙོ་སྐྱོང་གནང་བ་ཐོག་མ་དེ་རེད། ཤིན་ཏུ་རྩ་ཆེ་ཞིང་བརྒྱུད་པ་བར་མ་ཆད་པའི་སྒྲུབ་མཆོད་འདི་ཡིས་ལོ་ངོ་ཆིག་སྟོང་སུམ་བརྒྱའི་རིང་གི་འཁོན་གྱི་གདུང་རབས་ཀྱི་དབུ་འཕངས་དགུང་དུ་བཏེགས་གནང་མཛད་དོ།། བདག་མོ་ལྷ་མཛེས་ལགས་ཀྱིས་དབྱིན་ཡིག་ཏུ་བྲིས་ཤིང་སྤྲུལ་སྐུ་ཡེ་ཤེས་ཀྱིས་བོད་སྒྱུར་བྱས།

Last Updated: Monday, 31 August 2015 16:47

༧སྐྱབས་རྗེ་བདག་ཆེན་རིན་པོ་ཆེ་མཆོག་གིས་ཟབ་ཆོས་ཞི་ཁྲོའི་བཀའ་དབང་བསྩལ་པ།

 

 

སྤྱི་ཟླ་བཅུ་བའི་ཚེས་བཅུ་གཅིག་ཉིན་གྱི་སྔ་དྲོའི་ཆུ་ཚོད་བཅུ་བའི་སྟེང་དུ། གངས་ལྗོངས་རྡོ་རྗེ་འཛིན་པ་ཡོངས་ཀྱི་གཙུག་རྒྱན་དམ་པ། དཔལ་ས་སྐྱ་༧གོང་མ་བདག་ཆེན་རྡོ་རྗེ་འཆང་མཆོག་གིས་ས་སྐྱ་དགོན་པའི་ཆོས་ཚོགས་པས་གཙོས་པའི་དད་ལྡན་དྲུག་ཅུ་ཙམ་ལ་ཟབ་ཆོས་ཞི་ཁྲོ་དམ་པ་རིགས་བརྒྱའི་བཀའ་དབང་དགྱེས་བཞིན་བསྩལ། དེ་ཡང་ཐོག་མར་དབང་གི་གཞི་དཀྱིལ་འཁོར་གྱི་སྟ་གོན་སྟེ། དཀྱིལ་འཁོར་བཞེངས་པ་དང་མཆོད་པ་འབུལ་བ་སོགས་ཀྱི་རྗེས་སུ་སློབ་དཔོན་མཆོག་ཉིད་བདེ་གཤེགས་འདུས་པའི་ངོ་བོ་ཆོས་སྐུ་ཀུན་ཏུ་བཟང་པོའི་སྐུར་བཞེངས་ཏེ་དབང་སྒྲུབ་ཡོངས་སུ་རྫོགས་པ་གནང་གྲུབ་རྗེས། སློབ་མ་རྣམས་ཀྱིས་ཕྱི་རོལ་ཏུ་ཁྲུས་ཀྱི་བྱ་བ་བྱས་ཟིན་ནས་ལྷ་ཁང་ནང་དུ་ཞི་དུལ་བག་ཡོད་ཀྱི་སྤྱོད་ལམ་གྱིས་འདུས་རྗེས་དབང་གི་ཐོག་མར་སློབ་དཔོན་དང་དཀྱིལ་འཁོར་གྱི་ལྷ་ལ་མཎཌལ་འབུལ་བ་དང་གསོལ་བ་འདེབས་པ་སོགས་སྔོན་འགྲོའི་བྱ་བ་དག་གྲུབ་རྗེས། རེ་ཞིག་དཀྱིལ་འཁོར་ཆེན་པོ་ལ་བལྟ་བར་མི་དབང་བ་མཚོན་ཆེད་དུ་མིག་རས་དཀྲིས་ཤིང་། དེ་རྗེས་དཀྱིལ་འཁོར་གྱི་ལྷ་ལ་མེ་ཏོག་འབུལ་བ་སོགས་སྔོན་འགྲོའི་ཆོས་སྤྱོད་ཡོངས་སུ་གྲུབ་མཚམས། སློབ་དཔོན་གྱིས་དཀྱིལ་འཁོར་ཆེན་པོའི་དབུས་དང་ཕྱོགས་བཞིར་བཞུགས་པའི་ཡི་དམ་ཞི་ཁྲོའི་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་རྣམས་སྐལ་ལྡན་སློབ་མ་རྣམས་ཀྱི་སྒོ་གསུམ་དང་དབྱེར་མེད་དུ་བཞུགས་པའི་བཀའ་དབང་ཟབ་མོ་དགྱེས་བཞིན་ལེགས་པར་བསྩལ་པ་དང་། མཇུག་ཏུ་མཐའ་རྟེན་གཏོར་མའི་དབང་དང་བཅས་པ་ཡོངས་སུ་གྲུབ་པ་དང་། ཉིན་གུང་རྒྱབ་ཏུ་གུས་པ་སྤྲུལ་མིང་ཡེ་ཤེས་ཀྱིས་གོང་མ་བདག་ཉིད་ཆེན་པོའི་བཀའ་ལུང་བཞིན་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ཉིད་ཚུལ་ཇི་ལྟར་ཉམས་སུ་ལེན་པའི་སྐོར་ཆོས་ཚོགས་པ་ཚོར་རང་གིས་གང་ཤེས་ངོ་སྤྲོད་ཀྱང་མདོར་ཙམ་ཞིག་ཞུས་པ་བཅས་སོ།།

Last Updated: Monday, 31 August 2015 16:47

གདུང་སྲས་ཨ་བྷ་ཡ་རིན་པོ་ཆེ་མཆོག་གིས་རབ་བྱུང་གི་སྡོམ་པ་བཞེས་གནང་མཛད་པ།

 

གདུང་སྲས་ཨ་བྷ་ཡ་རིན་པོ་ཆེ་མཆོག་ནི་༧སྐྱབས་མགོན་གོང་མ་བདག་ཆེན་རིན་པོ་ཆེ་མཆོག་དང་བདག་མོ་སྐུ་ཞབས་རྣམ་གཉིས་ཀྱི་སྐུ་ཚ་དང་། འཁོན་གདུང་ཛ་ཡ་རིན་པོ་ཆེ་དང་བདག་མོ་ལྷ་མཛེས་རྣམ་གཉིས་ཀྱི་རིགས་སྲས་སུ་སྐུ་འཁྲུངས། ཁོང་གིས་སྤྱི་ལོ་༢༠༠༧ལོའི་སྟོན་ཁར་ཨ་རིའི་སེ་ཨ་རོལ་དུ་སློབ་གྲྭའི་འཛིན་རིམ་བཞི་བ་མཇུག་སྐྱོང་གནང་བ་དང་། སྤྱི་ལོ་༢༠༠༨ལོའི་ལོ་སྟོད་ནས་བཟུང་སྟེ་རྒྱ་གར་དུ་བཞུགས་པའི་ཁོང་གི་སྐུ་གཅེན་འཁོན་གདུང་ཨ་བྷི་ཥེ་ཏ་རིན་པོ་ཆེ་མཆོག་དང་ལྷན་དུ་ཁོང་གི་སྐུ་ཡོན་གསན་བཞེས་མུ་མཐུད་དེ་གནང་བཞིན་མཆིས།

འཁོན་གདུང་ཁོང་གིས་༧སྐྱབས་མགོན་གོང་མ་བདག་ཆེན་རིན་པོ་ཆེ་མཆོག་དང་ས་སྐྱའི་༧ཁྲི་འཛིན་རིན་པོ་ཆེ་མཆོག་རྣམ་གཉིས་ཀྱིས་གཙོས་པའི་དཔལ་ས་སྐྱའི་སྐྱེས་ཆེན་དུ་མ་ལས་དབང་ལུང་ཁྲིད་གསུམ་དུ་མ་གསན་བཞེས་མཛད་ཅིང་། རང་ལུགས་སྐུ་ཡོན་གསན་བཞེས་གནང་མགོ་བཙུགས་པ་དང་བཟུང་སྟེ་གདུང་སྲས་ཁོང་གིས་འཁོན་ལུགས་ས་སྐྱ་པཎ་ཌི་ཏ་དང་འགྲོ་མགོན་ཆོས་རྒྱལ་འཕགས་པ། དེ་བཞིན་བླ་མ་དམ་པ་བསོད་ནམས་རྒྱལ་མཚན་སོགས་ལས་བརྒྱུད་པའི་རབ་ཏུ་བྱུང་བའི་སྡོམ་རྒྱུན་བཞེས་རྒྱུར་ཐུགས་འདོད་ཆེན་པོ་གནང་། དེ་བཞིན་ཁོང་གིས་ 

འཁོན་གྱི་གདུང་རྒྱུད་འཛིན་རྒྱུ་དེ་ཅི་ཙམ་གལ་ཆེན་ཞིག་ཡིན་པ་དང་འབྲེལ་སྡོམ་བརྩོན་དམ་པའི་རྣམ་པར་སྐྱོང་རྒྱུའི་གནད་འགག་ཆེན་པོ་དེ་ཡང་གཟིགས། སྐུ་ཞང་འཕྲིན་ལས་རིན་པོ་ཆེ་མཆོག་དགོངས་པ་རྫོགས་དུས་འཁོན་གདུང་ཁོང་དགུང་ལོ་གཅིག་ཙམ་ལས་ཕེབས་མེད་པས། འཕྲིན་ལས་རིན་པོ་ཆེས་མཛད་པ་ཅི་གནང་ཐུགས་དྲན་མི་གནང་ཡང་། སྐུ་གཤེགས་ཁོང་འཁོན་ལུགས་སྡོམ་བརྩོན་དམ་པ་ཞིག་དང་ཐུགས་རྒྱུད་ལ་བག་ཆགས་བཟང་པོ་འཇོག་གནང་མཛད་པ་ཞིག་ཏུ་བཞུགས། སྤྱི་ཟླ་བདུན་པའི་ཚེས་ཉེར་ལྔ་དང་བོད་ཟླ་དྲུག་པའི་ཚེས་བཞི་སྟོན་པ་ཐུབ་པའི་དབང་པོ་མཆོག་གིས་འཁོར་ལྔ་སྡེ་བཟང་པོ་ལ་བདེན་པ་བཞིའི་ཆོས་ཀྱི་འཁོར་ལོ་བསྐོར་གནང་མཛད་པའི་དུས་ཚེས་ཁྱད་པར་ཅན་གྱི་ཉིན་མོ་འདི་ནི། ༧སྐྱབས་མགོན་གོང་མ་བདག་ཆེན་རིན་པོ་ཆེ་མཆོག་གི་དགོངས་ཁྲོལ་དང་ཐུགས་སྨོན་ཁྱད་པར་ཅན་དང་འབྲེལ། འཁོན་གདུང་ཁོང་གི་དམིགས་བསལ་ཁྱད་དུ་འཕགས་པའི་ཉིན་མོ་ཞིག་ཏུ་གྱུར། ཉིན་འདི་དག་གི་རིང་ལ། དཔལ་ས་སྐྱ་པའི་སྡོམ་བརྩོན་ཁྲི་ཕྲག་གི་གཙུག་རྒྱན་དམ་པ་སྐྱབས་རྗེ་ངོར་ཀླུ་ལྡིང་མཁན་རྒན་རིན་པོ་ཆེ་མཆོག་ལས་རབ་ཏུ་བྱུང་བའི་བསླབ་པ་རིན་པོ་ཆེ་འབོག་གནང་མཛད་རྒྱུ་རེད། སྡོམ་པ་འབོག་ཆོག་གི་མཛད་སྒོ་དམིགས་བསལ་བ་འདི་ངོེར་མཁན་རྒན་དང་མཁན་གཞོན་རྣམ་གཉིས་ཀྱི་བཞུགས་གནས་རྒྱ་གར་བྱང་ཕྱོགས་མན་ཀྲུ་ཝ་ལ་ས་གནས་སུ་ཡོད་པའི་ངོར་དགོན་པར་དབུ་འཛུགས་གནང་བ་དང་། སྒྲོལ་མ་ཕོ་བྲང་གི་བདག་མོ་སྐུ་ཞབས་མཆོག་དང་ར་སྤུར་ས་སྐྱའི་ཆོས་སྒར། ངོར་བླ་བྲང་ཁག་དང་ས་གནས་མི་འདྲ་བའི་སྐུ་ཚབ་སོགས་ཀྱིས་གུས་བརྩི་ཆེན་པོའི་སྒོ་ནས་གཟིགས་ཞིབ་བསྐྱངས།

མཛད་སྒོ་འདིའི་སྟེང་དུ་སྐྱབས་རྗེ་ཀླུ་ལྡིང་མཁན་ཆེན་རིན་པོ་ཆེ་དང་ཀླུ་ལྡིང་མཁན་པོ་སྐུ་གཞོན། ཁང་གསར་ཞབས་དྲུང་། ཨ་ཀྲོ་སྤྲུལ་སྐུ། རྒྱུད་གྲྭ་མཁན་པོ་དཀོན་མཆོག་རྒྱལ་མཚན་སོགས་བླ་སྤྲུལ་སྐྱེས་ཆེན་བཅུ་དང་གཉུག་མར་གནས་པའི་དགེ་འདུན་པ་ཁག་ཅིག་བཅས་ལྷན་བཞུགས་གནང་བ་དང་། མཛད་སྒོའི་སྔོན་དུ་འཁོན་གདུང་རིན་པོ་ཆེའི་དབུ་སྐྲ་འབྲེག་བཞེས་མཛད་དེ་ལྷག་མར་ལུས་པ་ཅུང་ཟད་ཅིག་བསླབ་པ་འབོག་ཆོག་གི་ཆོ་ག་དངོས་གཞིའི་སྐབས་སུ་བཞར་གནང་མཛད། ཁྱིམ་ནས་ཁྱིམ་མེད་པར་རབ་ཏུ་བྱུང་བའི་རྟགས་སུ་བྱིན་རླབས་ཅན་གྱི་ངུར་སྨྲིག་གི་ན་བཟའ་དང་མཚན་གནས་འབུལ་བཞེས། དེ་བཞིན་དེར་བཞུགས་བླ་གྲྭ་ལྷན་རྒྱས་ལ་ཐུགས་རྗེ་ལེགས་གསོལ་གྱི་བསྙེན་བཀུར་གྱ་ནོམ་པ་ཡང་འབུལ་བར་མཛད།

འཆར་ཅན་བཞིན་འཁོན་གདུང་ཁོང་གི་གསམ་བསམ་སློབ་གཉེར་གྱི་ཕྱོགས་སུ་མ་འོངས་པར་ཡང་འཐུས་ཤོར་མེད་པར་སྐུ་གཅེན་ཨ་བྷི་ཥེ་ཏ་རིན་པོ་ཆེ་དང་ལྷན་དུ་ཐུགས་གཉེར་མུ་མཐུད་དེ་གནང་རྒྱུ་དང་། ཅུང་ཟད་མི་འདྲ་བ་ནི་རབ་ཏུ་བྱུང་བའི་རྟགས་ཆ་ལུགས་དང་སྲུང་སྡོམ་ཁག ཟླ་རེའི་གསོ་སྦྱོང་དང་ལོ་རེའི་དབྱར་གནས་ཀྱི་ཆོ་ག དེ་བཞིན་ཆོས་སྤྱོད་ཟུར་བ་ཁག་ཅིག་ཡོད་པ་རེད།  གཞན་འཆར་ཅན་གྱི་བྱེད་སྒོ་དང་ཉམས་ལེན་གཞན་དག་ཐད་མི་འདྲ་བ་དེ་ཙམ་མེད།

འཁོན་གདུང་ཁོང་རྡོ་རྗེ་གླིང་དུ་ཡོད་པའི་ས་སྐྱ་གུམ་དགོན་པར་ཁོང་གི་སྐུ་གཅེན་དང་ལྷན་དུ་ཁྱུག་ཙམ་བཞུགས་རིང་ཐུགས་གཉེར་མུ་མཐུད་དང་། དེ་རྗེས་སྤྱི་ཟླ་དགུ་བའི་ནང་འཁོན་གདུང་རྣམ་གཉིས་ལྷན་དུ་ལྡི་ལི་གསར་པར་ཡོད་པའི་ས་སྐྱའི་ཕོ་བྲང་དུ་ཕྱག་ཕེབས་གནང་།

བདག་མོ་ལྷ་མཛེས་ནས་དབྱིན་ཡིག་ཏུ་བྲིས་ཤིང་སྤྲུལ་སྐུ་ཡེ་ཤེས་ཀྱིས་བོད་ཡིག་ཏུ་བསྒྱུར།

 

Last Updated: Monday, 31 August 2015 16:47

འཁོན་གདུང་ཨ་སངྒ་རིན་པོ་ཆེ་མཆོག་གིས་ཆོས་སྤྱོད་ཁག་ཅིག་ཚོགས་རྒྱུགས་སྤྲད་གནང་མཛད་པ།

 

 

 

སྤྱི་ཟླ་དགུ་བའི་ཚེས་བཅུ་རེས་གཟའ་ཕུར་བུའི་ཉིན། འཁོན་གདུང་ཨ་སངྒ་རིན་པོ་ཆེ་མཆོག་གིས་བལ་ཡུལ་ས་སྐྱ་ཐར་ལམ་དགོན་པར་ས་ལུགས་ཆོས་སྤྱོད་ཁག་ཅིག་ཚོགས་རྒྱུགས་སྤྲད་གནང་མཛད་པ་རེད། ཐར་ལམ་དགོན་དུ་ཉིས་སྟོང་ལྔ་ལོ་ནས་བཞུགས་ཤིང་འདི་ལོར་དགུང་ལོ་བཅུ་ལ་ཕེབས་པའི་གདུང་སྲས་རིན་པོ་ཆེ་ཁོང་བཞུགས་ཁྲི་ཆུང་ཆུང་ཞིག་ཏུ་བཞུགས་ཤིང་ཞལ་རས་སྟོན་པ་ཐུབ་པའི་དབང་པོའི་སྐུ་བརྙན་མཐོང་གྲོལ་ཆེན་མོར་ཕྱོགས་ཏེ་ལོ་ཟླ་འདི་དག་གི་རིང་ལ་ཐུགས་འཛིན་གནང་བའི་འདོན་ཆ་ཁག་ཆུ་ཚོད་གསུམ་དང་ཕྱེད་ཀའི་རིང་རྒྱུགས་འབུལ་གནང་། ཁོང་གིས་ཀུན་རིག་ཆོ་ག་དང་བསྐང་གསོ་སོགས་གལ་ཆེའི་ཕྱག་དཔེ་ཁག་ཧ་ཅང་ལས་སླ་བོའི་སྒོ་ནས་ཐུགས་འཛིན་གནང་བ་དང་། ཁོང་གི་ངོ་མཚར་བའི་ཐུགས་འཛིན་དང་མི་བརྗེད་པའི་གཟུངས་སྤོབས་གཉིས་ཆར་ཚོགས་ཞུགས་པ་ཡོངས་ཀྱིས་བསྟོད་བཀུར་བསྔག་གསུམ་རྒྱ་ཆེར་ཕུལ། ལོ་རེ་རེ་བཞིན་གདུང་སྲས་ཁོང་གིས་ཐུགས་མོས་ཆེན་པོའི་སྒོ་ནས་ཆོས་སྤྱོད་འདྲ་མིན་དག་ལ་གསན་སྦྱོང་གནང་བཞིན་པས་འདི་ལོ་དམིགས་བསལ་གང་མང་མིན། ཁོང་གིས་དགུང་ལོ་ལྔ་ལ་ཕེབས་པ་ནས་བཟུང་སྟེ་ཆོས་སྤྱོད་ཐུགས་འཛིན་གནང་རྒྱུས་མཚོན་པའི་སྐུ་ཡོན་གསན་བཞེས་གནང་དང་གནང་བཞིན་པ་ཡིན་ལ། དམིགས་བསལ་བླ་མ་རྣམ་པ་དང་བསླབ་པ་རྒན་པའི་གྲྭ་པ་དག དེ་བཞིན་མི་སྐྱ་ཉམས་ལེན་པ་རྣམས་ལ་མཚོན་ན་ལོ་རེ་བཞིན་ཁོང་གི་ངོ་མཚར་བའི་ཤེས་རབ་དང་། འགྲན་ཟླ་མེད་པའི་ཐུགས་ཁུར་དང་སྨིན་བཞིན་པའི་སྐུ་ན་སོགས་ངོ་མཚར་བའི་མཛད་སྤྱོད་ཁག་རྒྱུན་མར་འབྱུང་གིན་ཡོད། སྐུ་ན་རྒན་པའི་བླ་མ་ཞིག་གི་རྣམ་པ་ཐམས་ཅད་མཁྱེན་པའི་ཡེ་ཤེས་སྐུ་ན་གཞོན་པ་ཞིག་གི་སྐུ་ལུས་ལ་ཞུགས་པར་ཐེ་ཚོམ་ཕྲ་མོ་ཙམ་ཡང་མེད་པ་རེད། བདག་མོ་འཆི་མེད་ལགས་ཀྱིས་དབྱིན་ཡིག་ཏུ་བྲིས་ཤིང་སྤྲུལ་སྐུ་ཡེ་ཤེས་ཀྱིས་བོད་བསྒྱུར་བྱས།

 

Last Updated: Monday, 31 August 2015 16:47

 

Mailing List


Receive announcements about special events as well as a weekly email detailing all activities for the coming week.

 

Make a Donation


Help support Sakya Monastery through a donation or by becoming a Member.

 

Dharma Shop


Purchase select books, CDs, and other items at our online Dharma Shop!