དེ་རིང་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཡ་ང་བ་ཞིག་བྱུང་སྟེ་མི་མང་པོ་རྐྱེན་འདས་དང་རྨས་སྐྱོན། དེ་བཞིན་དགོན་པའི་གཙུག་ལག་ཁང་དང་གྲྭ་ཤག་སོགས་སྡོད་ཁང་མང་པོ་ཞིག་རྩ་བརླག་ཏུ་གྱུར་པའི་གནས་ཚུལ་ཐོས་པས་སེམས་ཁྲལ་ཆེན་པོ་བྱུང་ཞིང་། ངོས་ཀྱིས་བསླུ་མེད་དཀོན་མཆོག་གསུམ་ལ་ཚེ་འདས་རྣམས་ཀྱིས་བདེ་འགྲོའི་རྟེན་བཟང་འཐོབ་པ་དང་། རྨས་སྐྱོན་ཕོག་པ་རྣམས་མགྱོགས་མྱུར་དྲགས་སྐྱེད་ཡོང་བ། དེ་བཞིན་ཤུལ་ལུས་ནང་མི་རྣམས་ཀྱིས་གཙོས་པའི་འགྲོ་བ་རྣམས་སྡུག་བསྔལ་ལས་གྲོལ་བའི་གསོལ་བ་བཏབ་དང་འདེབས་བཞིན་ཡོད་པ་དང་།      འདི་གའི་ས་སྐྱ་དགོན་པའི་ཆོས་ཚོགས་པ་རྣམས་དང་ས་གནས་བོད་རིགས་རྣམས་མཉམ་འཛོམས་ཀྱིས་གངས་ལྗོངས་ལྷ་སྐལ་འཕགས་མཆོག་སྤྱན་རས་གཟིགས་ཀྱི་སྒོམ་བཟླས་དང་འབྲེལ་བའི་མ་ཎི་དང་སྨན་བླའི་མཚན་སྔགས། དེ་བཞིན་འཕགས་པ་བཟང་པོ་སྤྱོད་པ་སྨོན་ལམ་གྱི་རྒྱལ་པོ་བཅས་གང་མང་གསོག་སྒྲུབ་བྱས་དང་བྱེད་བཞིན་ཡོད་པ་ཐུགས་འཇག་འཚལ།།

                                           ཕུན་ཕོའི་འཇིགས་བྲལ་བདག་ཆེན་གྱིས།

                                                             སྤྱི་ཟླ་བཞི་པའི་ཚེས་བཅུ་བཞིའི་ཉིན།

འདི་ཟླའི་ཚེས་བཅུ་བཞི་ཉིན་བོད་མདོ་ཁམས་སྐྱེ་རྒུ་མདོ་དང་དེའི་གཡས་གཡོན་ས་ཁུལ་མང་པོ་ཞིག་ལ་འབྱུང་བ་ས་གཡོའི་རྐྱེན་ངན་བྱུང་སྟེ་མི་གྲངས་སྟོང་ཕྲག་གཉིས་ལྷག་འདས་གྲོངས་དང་མི་ཁྲི་ཕྲག་བརྒལ་བར་རྨས་སྐྱོན། དགོན་པ་ལྷ་ཁང་དང་གྲོང་མིའི་སྡོད་ཁྱིམ། དེ་བཞིན་སློབ་གྲྭ་དང་ཚོང་ཁང་སོགས་རྩ་བརླག་ཏུ་སོང་བ། མི་འབུམ་ཕྲག་གིས་གཉེན་བྲལ་ཁྱིམ་འཐོར་གྱི་སྡུག་བསྔལ་དོས་དྲག་པོ་མྱོང་དགོས་བྱུང་བ་སོགས་ལ་དམིགས་ཏེ། འདི་ག་ས་སྐྱ་དགོན་པར་སྐྱབས་མགོན་ས་སྐྱ་བདག་ཆེན་རིན་པོ་ཆེ་དང་གདུང་སྲས་རྣམ་པ། རྗེ་བཙུན་མ་རྣམ་པ་དང་བདག་མོ་རྣམ་པ། སྤྲུལ་སྐུ་ཡེ་ཤེས་དང་མཁན་པོ་བྱམས་པ་བསྟན་འཕེལ་སོགས་འདིར་བཞུགས་དགེ་འདུན་པ་རྣམ་པ། ས་སྐྱའི་ཆོས་ཚོགས་པ་རྣམ་པ་དང་ས་གནས་བོད་རིགས་ཚོགས་པ་བཅས་ལྷན་བཞུགས་ཀྱིས། འཕགས་མཆོག་སྤྱན་རས་གཟིགས་ཀྱི་སྒོམ་བཟླས་དང་འབྲེལ་བའི་མ་ཎི་ཡིག་དྲུག་དང་སྨན་བླའི་མཚན་སྔགས་གྲངས་གསོག འཕགས་པ་བཟང་པོ་སྤྱོད་པ་སྨོན་ལམ་གྱི་རྒྱལ་པོ་གསུང་སྒྲོག་བཅས་མཛད་ཅིང་། ཤུལ་ལུས་མི་མང་ལ་རོགས་དངུལ་ཞལ་འདེབས་འབོད་སྐུལ་གནང་བ་དང་། དེ་བཞིན་དགུང་ཞག་ཞེ་དགུའི་རིང་རེས་གཟའ་སྤེན་པ་ནམ་ཡིན་ལ་འདི་ག་ས་སྐྱ་དགོན་པའི་ཆོས་ཚོགས་པ་དང་ས་གནས་བོད་རིགས་རྣམས་མཉམ་འཛོིམས་ཀྱིས་སྨོན་ལམ་མུ་མཐུད་དེ་གསུང་འཆར་དང་། དགུང་ཞག་ཞེ་དགུ་ཚང་བའི་ཉིན་དཔལ་ས་སྐྱ་བདག་ཆེན་རིན་པོ་ཆེ་དབུ་བཞུགས་ཀྱིས་འདི་གར་ཀུན་རིག་རྣམ་པར་སྣང་མཛད་ཀྱི་སྒོ་ནས་གཤིན་པོ་རྣམས་ཀྱི་མིང་བྱང་སྲེག་ཆོག་ཀྱང་གནང་རྒྱུ་ཡིན་པའི་གནས་ཚུལ་བཅས། སྤྲུལ་སྐུ་ཡེ་ཤེས་ཀྱིས་སྤེལ། 

ངའི་མྱ་ངན་ཞུ་ཚིག

ཀླུ་སྨྱོིན་ཧེ་རུ་ཀ

སྐྱེ་རྒུའི་ས་ཡོམ་གྱི་ཁྲོད་དུ་གོད་ཆག་ཕོག་པའི་མི་མང་ལ་ཕུལ་བ།

འགྲོ་བ་སེམས་ཅན་གཉིད་ལས་སད་མ་སད་ཀྱི་དུས་ཚོད་ཅིག་ལ།

སྙིང་ལ་ཟུག་པའི་འུར་སྒྲ་ཞིག་གི་རྗེས་སུ།

ས་ཆེན་པོ་འདི་རིམ་པ་དྲུག་ཏུ་གཡོས་སོང་།

རིམ་པ་དྲུག་དང་གྲངས་ཆུང་དགུ་རུ་གཡོས་སོང་།

 

འུར་སྒྲ་དང་ཆོམ་སྒྲའི་ཀློང་ནས།

སྡོད་ཁང་བརྡིབས་སོང་ལ་ལྷ་ཁང་ཡང་འཇིག་སོང་།

ས་རྡུལ་དང་ངུ་འབོད་ཀློང་ནས།

མཆོད་རྟེན་ཉིལ་སོང་ལ་མགྲོན་ཁང་ཡང་ཞིག་སོང་།

 

ཕོ་མོ་དང་རྒན་གཞོན་མེད་པར།

བོད་མགོ་ནག་ཚོ་ས་གཅུར་རྡོ་གཅུར་བྱས་སོང་ལ།

ཆོལ་ཁ་དང་ཆོས་ལུགས་མེད་པར།

བོད་རྩམ་ཟན་ཚོ་དམར་པོ་ཁྲག་ལ་བསྒྲེས་སོང་།

 

ས་ཆེན་པོ་འདིར་སྙིང་རྗེ་ཅི་ཡང་མེད་པར།

དགོན་པའི་རྗེས་སུ་དགོན་པ་འཇིག་སོང་ལ།

གནམ་སྔོན་པོ་འདིར་མིག་ཟུང་ཅི་ཡང་མེད་པར། 

གྲོང་བའི་རྗེས་སུ་གྲོང་པ་བསྣུབས་སོང་།

 

ཉལ་སའི་ནང་གི་རྒན་རྒོན་ཚོ་བསད་སོང་ལ།

ཉིན་ལས་ཅན་གྱི་ན་གཞོན་ཚོ་བསད་སོང་།

སློབ་གྲྭའི་ནང་གི་བྱིས་པ་ཚོ་བསད་སོང་ལ།

དགོན་པའི་ནང་གི་བན་ཆུང་ཚོ་ཡང་བསད་སོང་།

 

སྐད་ཅིག་དེ་ཉིད་ལ།

མཛེས་སྡུག་གི་གྲོང་ཁྱེར་ཞིག་དམྱལ་ཁམས་བཅོ་བརྒྱད་དུ་བསྒྱུར་སོང་།

བལྟས་བལྟས་རིག་རིག་ལ།

ཞི་འཇགས་ཀྱི་གྲོང་བརྡལ་ཞིག་ངུ་འབོད་ཀྱི་འཇིག་རྟེན་དུ་གྱུར་སོང་།

 

ཡ་ང་བའི་སྲང་མདོ་རེ་རེ་ནས།

ཕ་མ་མེད་པའི་དྭ་ཕྲུག་གི་མིག་ནས་ཕ་མ་འབོད་པའི་མིག་ཆུ་ཁྲག་ཏུ་འབབ་ཅིང་།

ཡི་མུག་པའི་སྲང་བར་རེ་རེ་ནས། 

བུ་ཕྲུག་ཤི་བའི་ཕ་མའི་ངག་ནས་བུ་ཕྲུག་འབོད་པའི་ངུ་ངག་སྙིང་ལ་མཛེར་ཡོང་།

 

བཀྲ་ཤིས་ཀྱི་གཅེས་པའི་ཚེ་སྲོག་བརླགས་སོང་།

དོན་གྲུབ་ཀྱི་གཅེས་པའི་ལུས་པོ་བརླགས་སོང་།

ཚེ་རིང་གི་གཅེས་པའི་ཕ་མ་བརླགས་སོང་།

ཟླ་བ་ཡི་གཅེས་པའི་བུ་ཕྲུག་བརླགས་སོང་།

 

མདོར་ན།

བརྩེ་དུང་མཚོ་ལས་ཟབ་པ་ཐམས་ཅད་ས་འོག་ཏུ་ཚུད་སོང་།

ཞེན་ཆགས་རི་ལས་ལྕི་བ་ཡོད་ཚད་ས་འགུལ་གྱིས་ཁྱེར་སོང་།

ཤུལ་དུ་ཅི་ཡང་མ་ལྷག་པར་ས་འོག་ཏུ་ཐིམ་སོང་།

 

དཀོན་མཆོག་གསུམ་པོའི་སྤྱན་གྱིས་གཟིགས་ས་ནས།

སྐྱེ་རྒུའི་མི་མང་ས་འོག་ཏུ་ཚུད་སོང་།

ཆོས་སྐྱོང་སྲུང་མའི་རྣ་བའི་གོ་ས་ནས།

སྐྱེ་རྒུའི་མི་མང་ས་འགུལ་གྱིས་མནན་སོང་།

 

དེ་རིང་།

གྲོང་ཁྱེར་ནི་གྲོང་ཁྱེར་དང་མི་འདྲ་བར་དུར་ཁྲོད་དང་འདྲ་ལ།

དེ་རིང་།

དགོན་པ་ཡང་དགོན་པ་དང་མི་འདྲ་བར་གཡུལ་ས་དང་འདྲ།

 

ཨུ་ཧུ་དཀོན་མཆོག་གསུམ།

དེི་རིང་མ་སེམས་ཅན་སྡུག་བསྔལ་གྱི་དོང་ཞབས་སུ་ལྷུང་སོང་ལ།

ཨུ་ཧུ་སྤྱན་རས་གཟིགས།

དེ་རིང་འབངས་་མགོན་མེད་སྐྱོ་གདུང་གི་དྲ་བ་རུ་ཚུད་སོང་།

 

དེ་རིང་གཅེས་པའི་ཚེ་སྲོག་ཤོར་སོང་ལ།

དེ་རིང་བསགས་པའི་རྒྱུ་ནོར་བརླགས་སོང་།

དེ་རིང་མཛའ་བའི་གཉེན་བཤེས་གྲོངས་སོང་ལ།

དེ་རིང་མིག་གི་མཆི་མ་ཡང་བསྐམས་སོང་།

 

ད་ནི་ཕ་མ་མེད་པའི་དྭ་ཕྲུག་དེ་ཚོར་སུས་བདག་པོ་རྒྱག་གི་རེད།

ད་ནི་བུ་ཕྲུག་མེད་པའི་རྒན་རྒོན་དེ་ཚོར་སུས་གཉོར་སྐྱོང་བྱེད་ཀི་རེད།

ད་ནི་ལས་ལ་ཁ་གཡར་ནས་ལྷོད་ལྷོད་སྡོད་ཀྱི་ཡིན་ནམ།

ད་ནི་ལམ་ལ་ཆས་ནས་རོགས་རམ་བྱེད་མགོ་རྩོམ་གི་ཡིན།

 
ད་ནི་ལག་གཉིས་ཐལ་མོ་སྦྱར་ཏེ།

འདས་གྲོངས་ཕྱིན་པ་དག་བདེ་བ་ཅན་ནས་སྐྱེ་བའི་སྨོན་ལམ་དང་།

ད་ནི་མིག་གཉིས་མཆི་མས་གང་སྟེ།

ཤུལ་དུ་ལུས་པ་ཚོར་སྡུག་བསྔལ་ལས་ཐར་བའི་རོགས་རམ་བྱེད།

འདི་ཟླའི་ཚེས་བཅུ་གཅིག་རེས་གཟའ་སྤེན་པའི་སྔ་དྲོར། སྐྱབས་མགོན་གོང་མ་འཇིགས་བྲལ་བདག་ཆེན་རིན་པོ་ཆེ་མཆོག་དང་གདུང་སྲས་ས་དྷུ་རིན་པོ་ཆེ། བདག་མོ་སྐུ་ཞབས་མཆོག་དང་ས་དྷུ་རིན་པོ་ཆེའི་བདག་མོ་དང་སྲས་མོ་རྣམ་པ། ས་དགོན་མཁན་པོ་བྱམས་པ་དང་བླ་མ་མིག་དམར། གུས་པ་སྤྲུལ་སྐུ་ཡེ་ཤེས། ཆོས་ཚོགས་པ་ཁིར་སི་ཁྲིན་ཧོན་ད་སོགས་ས་སྐྱ་དགོན་པ་ནས་བྱང་ཕྱོགས་སུ་རྒྱང་ཐག་རིང་ཙམ་གྱི་སར་ཡོད་པའི་མཚོ་འགྲམ་དུ་ཕེབས་ནས། གོང་ས་སྐྱབས་མགོན་རྒྱལ་བའི་དབང་པོ་མཆོག་དང་། སྐྱབས་མགོན་གོང་མ་འཇིགས་བྲལ་བདག་ཆེན་རིན་པོ་ཆེ། བདག་མོ་སྐུ་ཞབས་མཆོག་སོགས་བསྟན་འཛིན་གྱི་སྐྱེས་ཆེན་གང་ན་སུ་བཞུགས་དག་གི་སྐུ་ཚེ་རིང་ཞིང་མཛད་འཕྲིན་འཕེལ་བ་དང་། ཐུབ་པའི་བསྟན་པ་རིན་པོ་ཆེ་འདི་ཉིད་དུས་རྟག་ཏུ་མི་ཉམས་གོང་དུ་འཕེལ་བ་དང་། ལུས་ཅན་ཀུན་གྱིས་གནས་སྐབས་སུ་རྣམ་དཀར་ཞི་བདེའི་དཔལ་ལ་ལོངས་སུ་སྤྱོད་པ་དང་། མཐར་ཐུག་རྣམ་མཁྱེན་རྒྱལ་བའི་གོ་འཕང་འཐོབ་པ་སོགས་ཀྱི་ཆེད་དུ་དམིགས་ནས། མཚོར་གནས་སྲོག་ཆགས་སྡིག་སྲིན་བརྒྱ་དང་བརྒྱད་ཅུ་གྱ་ལྔ་ཚོང་ཁང་ནས་ཉོས་ཡོང་བ་དང་། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་དང་། ཚེ་ལྷ་རྣམ་གསུམ་གྱི་གཟུངས་སོགས་གསུངས་གྲུབ་རྗེས། སྔོན་བྱོན་དང་ད་ལྟར་བཞུགས་པའི་སྐྱེས་ཆེན་དམ་པ་དུ་མས་བསྒྲུབས་གནང་བའི་དམ་རྫས་ཀྱི་ཆུས་སེམས་ཅན་དེ་དག་གི་ལུས་ལ་བྲན་པ་སོགས་གྲུབ་ནས། སྲོག་ཚགས་ཉམ་ཐག་དེ་ཚོར་མི་འཇིགས་སྲོག་གི་སྦྱིན་པ་བསྩལ་ནས་མཚོ་ནང་དུ་མངགས་པ་དང་། རླབས་ཆེན་གྱི་མཛད་རིམ་འདི་གྲུབ་ནས་ཉིན་གུང་བཞེས་ལག་གྲུབ་རྗེས་སྐྱབས་མགོན་གོང་མ་འཇིགས་བྲལ་བདག་ཆེན་རིན་པོ་ཆེ་སྟོན་འཁོར་ཕྱིར་སེ་ཨ་རོལ་བཞུགས་གནས་སུ་ཕེབས་པ་དང་། གུས་གྲྭ་པ་གསུམ་དང་ཆོས་ཚོགས་པ་འགའ་ས་གནས་དེར་ཡོད་པའི་སྙན་གྲགས་ཅན་གྱི་མེ་ཏོག་ལྡུམ་རྭ་ཞིག་ཏུ་བསྐྱོད་དེ་མཛེས་སྡུག་གི་ས་གདན་ཐང་ལ་བཏིངས་པ་ལྟ་བུའི་ཁ་དོག་སྣ་ཚོགས་ལྡན་པའི་མེ་ཏོག་གི་སྐྱེད་ཚལ་ཉམས་དགའ་བ་དེ་མིག་གི་ལོངས་སྤྱོད་དུ་བསྟར།  

སྤྱི་ཟླ་གསུམ་པའི་ཚེས་ཉེར་གཅིག་རེས་གཟའ་ཉི་མའི་ཉིན་གྱི་སྔ་དྲོིར། ༧སྐྱབས་མགོན་༧གོང་མ་༧བདག་ཆེན་རིན་པོ་ཆེ་མཆོག་གིས་ཕུན་ཕོའི་གདུང་སྲས་རྣམ་པ་དང་རྗེ་བཙུན་མ་རྣམ་པ། དེ་བཞིན་བདག་མོ་རྣམ་པས་གཙོས་པའི་འདི་ག་ས་སྐྱ་དགོན་པའི་འདུས་ཚོགས་གསར་རྙིང་བརྒྱ་སྐོར་ཞིག་ལ་རྡོ་རྗེ་རྣལ་འབྱོར་མའི་དབང་བཞི་བྱིན་རླབས་ཀྱི་ཚུལ་དུ་དགྱེས་བཞིན་བསྩལ།

དེ་ཡང་ཐོག་མར་སྔོན་དུ་འགྲོ་བ་དཀྱིལ་འཁོར་གྱི་ཁང་བཟང་མཛེས་པར་ཕུབ་པ་དང་བཀོད་ལེགས་ཚར་དུ་དངར་བའི་མཆོད་པའི་དངོས་པོ་དང་ཚོགས་ཀྱི་འཁོར་ལོའི་ཡོ་བྱད་སོགས་བཤམ་བཀོད་ལེགས་པར་གྲུབ་རྗེས། བདག་ཆེན་རིན་པོ་ཆེ་མཆོག་གིས་བྱིན་རླབས་ཀྱི་སྔོན་འགྲོའི་བདག་བསྐྱེད་རྒྱས་པར་གསུངས་པ་དང་། སློབ་མ་རྣམས་ལྷ་ཁང་ནང་དུ་འདུས་མཚམས་བླ་མའི་ངོས་ནས་གདམས་ངག་ཟབ་མོ་འདིའི་བླ་མ་བརྒྱུད་པ་ངོ་སྤྲོད་དང་གསང་སྔགས་ལུགས་ཀྱི་བླ་མ་བསྟེན་ཚུལ་དང་དམ་ཚིག་བསྲུང་ཚུལ། མདོ་སྔགས་ཀྱི་སྐྱབས་འགྲོའི་ཁྱད་པར། དམ་པའི་ཆོས་ཉན་དུས་སུ་རང་སེམས་བྱིངས་རྒོད་གཡེང་གསུམ་གྱི་དབང་དུ་མི་གཏོང་ཚུལ་སོགས་ཞལ་གསལ་གོ་བདེའི་ངང་ལྷུག་པར་གསུངས་ཤིང་། བར་དུ་དགེ་བ་བྱིན་རླབས་དངོས་གཞིའི་སྐབས་སུ་མཁའ་སྤྱོད་མའི་སྐུ་གསུང་ཐུགས་ཀྱི་བྱིན་རླབས་ཟབ་མོ་ལེགས་པར་བསྩལ་ཅིང་། མཐའ་མར་དགེ་བ་རྗེས་བསྔོ་བ་སོགས་ཀྱི་མཇུག་ཏུ་མཐར་བརྟེན་གཏོར་མའི་བྱིན་རླབས་གནང་བ་དང་། ཆོས་ཚོགས་པ་རྣམས་ཀྱིས་༧གོང་མ་བདག་ཆེན་རིན་པོ་ཆེ་མཆོག་སྐུ་ཚེ་བསྐལ་བརྒྱར་བརྟན་པར་བཞུགས་པའི་གསོལ་འདེབས་དང་འབྲེལ་མནཌལ་སྐུ་གསུང་ཐུགས་རྟེན་མཇལ་དར་སོགས་ཕུལ་ནས་བཀའ་ཆོས་ཀྱི་མཛད་སྒོ་ལེགས་པར་གྲུབ།